L-Iskola tal-Mużika ta’ Malta nediet Studju tal-Opera

Id-Dipartiment tal-vuċi fl-Iskola tal-Mużika Malta, fi ħdan il-Kulleġġ Mikiel Anton Vassalli nhar it-Tnejn 14 ta’ Frar 2022 nediet l-Istudjo tal-Opera tagħha, permezz ta’ kunċert ġewwa s-Sala Robert Sammut, li ntlaqa’ b’tifħir kbir kemm mill-pubbliku u kif ukoll mill-kritiċi.

Is-Sra Maria Blanco, Amministrattriċi tal-Iskola tal-Mużika, introduċiet il-kunċert bħala “il-bidu ta’ vjaġġ eċitanti għall-iskola u tal-iżvilupp tal-istudji operistiċi f’Malta”. L-Iskola tal-Mużika f’Malta ilha żmien tħoss il-ħtieġa li toffri pjattaforma għall-istudenti li jkunu f’livell avvanzat fl-istudji tagħhom sabiex dawn jesploraw u jiksbu l-esperjenza fil-prestazzjoni tal-opera u tal-palk. L-għan tal-Istudjo tal-Opera fi ħdan l-Iskola tal-Mużika Malta hu li dan joffri lil dawn l-istudenti f’livell avvanzat l-opportunita` sabiex jesploraw

snajja’ differenti tal-palk u sabiex dawn jaħdmu ma’ kantanti professjonali, surmastrijiet u diretturi tal-palk, billi jfornuhom bl-għodod meħtieġa biex dawn fuq il-palk ikunu kapaċi għal kollox.

Waqt il-kunċert, il-kantanti tal-Istudjo tal-Opera ppreżentaw selezzjoni kkulurita u varjata li kienet imħejjija tajjeb immens ta’ xeni permezz ta’ ensemble minn opri li huma maħbuba ferm ta’ Mozart, Bizet, Verdi u Puccini fost l-oħrajn. Ir-repertorju u t-tħejjija tal-istudenti kien riżultat ta’ ħidma eċċezzjonali mit-tim tal-għalliema tal-vuċi ġewwa l-Iskola tal-Mużika f’Malta Ms Miriam Cauchi, Dr Andriana Yordanova, Ms Graziella Debattista u Mr Luis Aguilar, bl-għajnuna ta’ Mro Riccardo Bianchi. Il-Kap tad-Dipartiment tal-vuċi, Is-Sra Miriam Cauchi qalet “l-għażla tar-repertorju kienet maħsuba apposta sabiex toqgħod u tkun addattata għall-kantanti magħżulin. L-għan tagħna hu li nikkultivaw il-vuċijiet tagħhom permezz ta’ repertorju b’saħħtu li min-naħa tiegħu ikun qed jgħin sabiex il-vuċijiet jiżviluppaw fid-direzzjoni t-tajba.”

L-istudenti li ħadu sehem, li l-kapaċitajiet tagħhom fil-vuċi jvarjaw minn dawk ta’ vuċijiet żgħażagħ sa vuċijiet iktar maturi, inqdew bil-midia soċjali biex esprimew is-sodisfazzjon u l-ħajr tagħhom għal dan il-proġett, li qed jiprometti orizzonti iktar miftuħa għalihom. L-iskola tal-Mużika f’Malta qed tagħmel l-almu tagħha biex iżżid il-kollaborazzjoni mal-Orkestra Filarmonika ta’ Malta li tat is-sapport kollu tagħha għal dan il-kunċert u ma’ entitajiet kulturali oħrajn sabiex ikomplu joffru opportunitajiet ġodda fuq skala nazzjonali.

L-Opera Studjo fi ħdan l-iskola tal-Mużika Malta issa fetaħ sejħa għall-applikazzjoni għal soprani, mezzo soprani, tenuri, baritni u baxxi. L-awdizzjonijiiet ser isiru fl-ewwel ġimgħa ta’ Marzu 2022. Għall-applikazzjonijiet u iktar informazzjoni, jekk jogħġobkom iktbu lill -mavc.schoolofmusic@ilearn.edu.mt

Ritratti: Elisa von Brockdorff