Il-Kisba ta’ Diploma fl-Arti Viżwali u tal-Ispettaklu

Ċerimonja ta’ gradwazzjoni għall-ewwel grupp ta’ studenti li jattendu l-Kulleġġ Mikiel Anton Vassalli (MAVC) u li temmew b’suċċess l-istudji tagħhom fl-aħħar sena akkademika u kisbu d-Diploma ta’ livell 5, saret il- Ġimgħa 15 ta’ Novembru 2019.

Il-Kulleġġ Mikiel Anton Vassalli huwa n-netwerk nazzjonali ta’ skejjel speċjalizzati għall-Edukazzjoni tal-Arti Viżwali u tal-Ispettaklu f’Malta u Għawdex. Dawn jinkludu l-Malta School of Art, il-Malta School of Drama and Dance, il-Malta School of Music kif ukoll il-Gozo and Malta Visual and Performing Schools. Bħalissa madwar 4,000 student huma irreġistrati f’dawn l-iskejjel bi kważi 200 Għalliema u Edukaturi b’passjoni għall- edukazzjoni tal-arti.

Din iċ-ċerimonja simbolika li għaliha attenda l-Ministru għall-Edukazzjoni u x-Xogħol l-Onor Evarist Bartolo tinkludi wkoll għadd ta’ wirjiet u preżentazzjonijiet mill-istudenti gradwati.

L-avveniment kien jinkludi preżentazzjonijiet u wirjiet mill-istudenti nfushom:
Maria Eleonora Zammit, Suzanna Marie Bezzina u Marisa Galea laħqu MQF Livell 5 fil-Klassifikazzjoni tal-Vuċi Klassika. Celine Schembri laħqet ukoll il-Livell 5 fil-Mużikoloġija flimkien ma’ Sarah Agius li laħqet dan il-livell fil-Pianoforte. Il-5 gradwati kollha studjaw fl-Malta School of Music.

L-istudenti Għawdxin Chantel Mercieca u Maria Refalo li jattendu l-Gozo Visual and Performing School laħqu l-Livell 4 fil-Għarfien u l-Fehim tal-Mużika.

Mill-Malta School of Drama and Dance, kemm Amy Schembri kif ukoll Darren Sciberras laħqu l-livell 4 tal- MQF fil-Flamenco u t-Teatru Mużikali rispettivament. Lilyana Tranulova, studenta oħra li tattendi l-Kulleġġ kisbet id-Diploma fl-Arti Viżiva mill- Malta School of Art.

Il-Prinċipal tal-Kulleġġ Is-Sur Victor Galea spjega li, wara dan l-avveniment ta’ suċċess, il-Kulleġġ żied kriterja ieħor ta’ suċċess. Minbarra ż-żieda kontinwa ta’ studenti rreġistrati f’dawn l-iskejjel speċjalizzati – liema ħlasijiet huma sussidjati mill-istat – “Għandna naraw li l–persentaġġ ta’ dawk li fil-fatt jibdew u jtemmu studju f’xi waħda mid-dixxiplini fl-arti viżwali u tal–ispettaklu jiżdied ukoll “.

Diploma jew MQF Livell 5 hija l-ogħla kwalifika offruta s’ issa fil-Kulleġġ Mikiel Anton Vassalli.