Merħba lill-Kap tal-iSkola l-ġdida tal-iSkola tal-Mużika, f’Malta fi ħdan il-Kulleġġ Mikiel Anton Vassalli.

Għeżież Kollegi, Ġenituri u Studenti tal-iSkola tal-Mużika fi ħdan il-KMAV, Malta,

Hu pjaċir tiegħi li nilqa’ lis-Sra Maria Blanco, li għadha kemm ingħatat il-kariga ta’ Kap tal-iSkola tal-Mużika fi ħdan il-Kulleġġ Mikiel Anton Vassalli.

Is-Sra Blanco ingħaqdet magħna minn mal-Orkestra Filarmonika ta’ Malta, li fiha reċentement kienet qed tmexxi id-dipartiment tal-Edukazzjoni u l-Iżvilupp. Qabel dan Maria ħadmet b’mod intensiv fil-qasam tal-edukazzjoni tal-mużika barra minn xtutna, fejn kellha l-irwoli bħala Kap tad-Dipartiment ġewwa l-iSkola Ministerjali u Surmast Direttriċi tal-Mużika ġewwa l-Workshop College Prep School f’Nottinghamshire. 

Is-Sra Blanco hi alumina tal-Universita ta’ Malta, tal-Akkademja tal-Mużika Liszt Ferenc Academy ġewwa Budapest, tar-Royal Northern College of Music u tal-Universita ta’ Nottingham Trent ġewwa r-Renju Unit.

Nixtieq naqsam magħkom li mid-diskussjonijiet immedjati li kelli mas-Sra Blanco, inħoss li għandha xewqa ferventi sabiex tiżviluppa l-edukazzjoni tal-mużika ġewwa Malta u qed iġġorr magħha l-entużjażmu kbir li toħloq opportunitajiet ġodda ta’ tagħlim għall-istaff u għall-istudenti tal-iSkola tal-Mużika f’Malta. Ir-rabtiet preċedenti tagħha mal-iskola fi ħdan il-kulleġġ tagħna, diġà jtuha xi ftit fehim u għarfien sabiex tkun tista’ taħdem id f’id fil-viċin u tmexxi il-ġmiel ta’ tim ta’ għalliema, membri oħra tal-istaff u l-istudenti tal-iskola tagħna.

---

---

Ippermettuli nieħu l-opportunita` sabiex nirringrazzja lil kulħadd matul il-perjodu li fih jien kont qed nipprova nimla l-vojt li kien hemm ta’ nuqqas ta’ Kap ta’ Skola ġewwa din l-iskola speċjaliżżata. Primarjament nixtieq nirringrazzja lis-Sra Odette Chetcuti li ser tibqa’ magħna bħala l-Ko ordinatriċi full time taċ-Ċentru. Nirringrazzjaha għax-xogħol kbir u siewi li għamlet u għall-impenn tal-għaġeb li hi wriet matul dan il-perjodu kemmxejn twil. Inħoss li ħdimna flimkien b’mod tassew brillanti, ħajr ukoll lis-7 Mexxejja tad-Dipartimenti Mużikali għall-isforzi żejda li għamlu f’ħidmiethom u fl-impenn tagħhom lejn l-iskola, kif ukoll lill-membri kollha tal-Bord tal-iStudji tal-iSkola. Bħal dejjem nibqa’ ngħożż il-koperazzjoni tagħkom.

Flimkien inkomplu l-iżvilupp tal-iSkola tal-Mużika f’Malta u nkomplu nwettqu l-viżjoni tal-Kulleġġ Mikiel Anton Vassalli: il-Kulleġġ għall-Edukazzjoni tal-Arti Viżwali u Performattiva ġewwa Malta u Għawdex.

Tislijiet,
 
Victor Galea
Kap tan-Netwerk tal Kulleġġ